Addis Ababa,(insidesomalia.org)- Madaxweynayaasha Dalalka ku mideysan Urur Gobaleedka IGAD ayaa maanta iskugu tagaya hool weyn oo kuyaala Magaalada Addis Ababa ,ayagoo halkaasi ku yeelanaya Shir ay kaga hadlayaan xaaladaha ay ku sugan yihiin Wadamada ku bahoobey IGAD.

Madaxweynayaasha Soomaaliya ,Kenya ,Suudaan ,Jabuuti iyo Raysalwasaaraha Itoobiya ayaa xaadir ku ah Magaalada Addis Ababa ee Dalka Itoobiya, ayagoo doonaya in ay qeybqaataan Shirweynaha Madaxweynayaasha Urur Gobaleedka IGAD oo maanta furmaya.

Dhamaantoodba Masuuliyiin sarre ee ka qeybgalaya Shirka waxaa lafilayaa in ay halkaasi ka soo jeedin doonaan Warbixino ku aadan xaaladaha Dalalkooda iyo waxyaabaha loo baahan yahay in wax laga qabto.

Madaxweynaha Soomaaliya ayaa lafilayaa in uu halkaasi ka soo jeediyo warbixin ku aadan xaalada Soomaaliya iyo waxyaabaha ay Dawladdiisu ka dooneyso Dawladaha ku jira IGAD in ay gacan ka siiyaan.

Madaxweyne Yuusuf ayaa lafilayaa sidoo kale in uu ka codsado Dawladahaasi in ay yeeshaan iskaashi wanaagsan iyo wada shaqeyn si looga baxo dhibaatada ka taagan Bariga Africa.

Saraakiil ka socota Dawladda Jabuuti oo maanta Shirka jooga ayaa lafilayaa in ay halkaasi ka cadeeyaan mawqifkooda ku aadan Xaaladaha Soomaaliya iyo dagaalada ay Elereya kusoo qaaday Dalka Jabuuti.

IGAD waxaa ku mideysnaa Wadamo gaaraya 7 Wadan ,balse hada waxaa ku haray oo kaliya 5 Dawladood, ayadoo ay ka baxday shirkaasi Xukuumada Asmara ,markii ay arimaha Soomaaliya ururku Mowqif wanaagsan ka istaagey.

Shirkan ayaa lafilayaa in uu dhamaadkiisa ka soo baxaan go'aamo waa weyn ,kuwasoo ay Khuburo badan aaminsan yihiin in lugu soo qaadayo dagaalada lugu soo qaaday Jabuuti & Arimo kale oo ay arinta Soomaaliya ku jirto.